Расейцаў канчаткова прыроўніваюць да дэбілаў

Расейскі парлямэнт ды прэзыдэнт Мядзьведзеў вырашылі зацьвердзіць закон, паводле якога непаўнагадовым нельга будзе знаходзіцца на двары па 22-ой гадзіне без дагляду дарослых. Дзякуй chegor за наводку.

Падаецца мне, нешта падобнае было й пры Радзянскім Зьвязе, але тады мала хто чапляўся да падлеткаў, што шпацыравалі па вуліцы гэтай своеасаблівай камэнданцкай гадзінай. Наўрад ці міліцыянтам цягнула выстаўляць сябе ідыётамі, што выконваюць загадзя дурны загад. А вось насьпела крыза - і закон вырашылі аднавіць. Пры гэтым я цалкам упэўнены, што ў Расеі замест рэальнага яго выкананьня міліцыянты атрымалі да рук яшчэ адну магчымасьць вымагаць грошы з бацькоў тых дзетак або зь іх саміх.

Таксама ў Расеі датэрмінова вызвалілі сп. Буданава, чалавека, які забіў чачэнскую дзяўчыну. Пры гэтым цяжарная праўнічка ЮКАСа сп. Бахміна, якая не ўзьняла рукі на чалавечае жыцьцё, застаецца ў вязьніцы з пэрспэктывай адседзець увесь тэрмін да званка. Вызваленьне Буданава ды адмова ў УДВ Бахмінай суправаджаліся "годным" лямантам расейскіх інтэрнаўтаў, што ўхвалялі й першае, і другое. Маўляў, сп. Буданаў абараняў Расею, а Бахміна яе рабавала. А тое, што цяжарную жанчыну пакідаюць у вязьніцы, выракаючы ейных дзетак на зьняволеньне разам з маці, нікога не цікавіла. У сучаснай Расеі забойцы стаяць вышэй за ўсіх іншых. Па сутнасьці, вызваляючы сп. Буданава, расейская ўлада падпісала загадзя індульгенцыю ўсім, хто забівацьме "ў імя Расеі".